南韓嘅賽車女郎從佢哋嘅長相到身材，加上性感嘅賽車女郎制服，所散發出嚟嘅味道，都令人一見傾心。不過當中有一位賽車女郎，卻以萌味取勝，同時亦係一位咖啡師，呢種內外兼備嘅氣質倍感吸引，佢就係趙仁英。
賽車女郎可以話係賽車場上，除咗賽車手外，另一個最為男士所注意嘅角色。不過喺眾多外形美艷嘅南韓賽車女郎中，卻有一位憑住可愛嘅樣貌而成為拍攝嘅焦點，佢就係趙仁英。呢位擁有惹火三圍及高挑身材嘅人氣賽車女郎，早喺成為大家嘅焦點前，已經從事兼職模特兒工作。及至2013年時，佢參加第二屆南韓賽車女郎比賽，獲得最佳業餘模特兒獎。憑住呢次突出表現，佢決定全身投入車模工作，同年更首次以專業車模身份，喺首爾車展中亮相。喺2014年時，佢再次參加南韓賽車女郎比賽，不但獲得優秀賽車女郎嘅季軍，同時獲得最上鏡賽車女郎獎，從此正式踏入賽車女郎界。獲獎後，佢同年喺亞洲勒芒系列賽南韓站比賽中登場，而呢次亦係佢首次於賽車場上演出。可愛嘅樣貌加上迷人嘅身段，令佢成為眾多賽車女郎中嘅焦點，人氣亦直線飆升。自此以後，經常喺各個賽車大賽及車展中搵到佢嘅身影。去年，佢第三次參加南韓賽車女郎比賽，而比賽經驗豐富嘅佢，終於榮獲年度最佳賽車女郎大獎！
憑住佢喺車模及賽車女郎界中嘅出色表現，佢嘅人氣愈嚟愈高，甚至有人組成粉絲團，但凡有佢演出嘅車展同賽車比賽，都會專程到去到捧場。
用咗3年時間，由一位業餘模特兒，變身成一位專業兼極具人氣嘅車模及賽車女郎，佢所憑藉嘅係不斷努力同堅持，尤其係當面對各種批評時，點樣可以尋回自我，控制情緒，以求達至理想嘅演出，當中嘅辛酸絕非外人所能明白。不過話說回來，原來喺佢決定全身投入車模界前，佢一直有成為高級咖啡師嘅打算，並且以此為目標而努力，因此佢喺入行前，已經取得咖啡師嘅專業資格。正當佢諗住繼續考取高級咖啡師資格時，喺賽車女郎比賽中，獲得最佳業餘模特兒獎，令佢感到十分困惑，究竟繼續堅持咖啡之路，定係轉做全職模特兒呢？經過佢一番思索後，覺得可以畀自己幾年嘅時間，嘗試喺模特兒界發展，若然真係做唔嚟嘅話，先至繼續咖啡師嘅夢想。不過世事嘅嘢就係咁奇妙，模特兒事業愈做愈好，好到佢根本從未諗過有今日嘅成績。佢見自己同咖啡之間嘅距離愈嚟愈疏遠，早前佢決定喺百忙嘅模特兒工作中抽出時間，喺咖啡店內學師，考取高級咖啡師資格之餘，更希望喺3年內開設個人咖啡室。既可以為未來離開模特兒界鋪路，又可以完成一直以嚟成為高級咖啡師嘅夢想。
簡介：趙仁英可愛迷人嘅形象，不但成為賽車場上嘅焦點，更憑住萌爆嘅樣貌紅遍網絡。不過大家咪睇佢外表可愛，就以為佢係個柔弱嘅女性，其實佢嘅性格相當活潑兼有主見，絕對係個外柔內剛嘅索女。想了解佢多啲，Click上其社交網站（目及）（目及）。
網址：https://www.instagram.com/inrong2/
出生地：首爾
身 高：172cm
三 圍：33、24、34
撰文：魂