政情：公民講場：游梁宣誓惹公憤 小麗變鞋靶受罪

青年新政立法會議員梁頌恆同游蕙禎嘅宣誓風波沒完沒了，事件除咗搞到立法會開唔成大會之外，仲影響埋自決派嘅議員劉小麗兩度宣唔到誓。嚟緊嘅星期三宣唔宣到誓都仲係未知之數，尋日劉小麗出席電視節目，主題明明講緊特首選舉，不過就有親建制團體嘅人士就宣誓問題指摘劉小麗，用口仲用手，剝咗隻波鞋掟出去，結果劉小麗被波鞋掟中胸口同左手添！明明劉小麗都無講「支那」，但就畀梁、游拖累，宣唔到誓不特止，仲做咗佢哋嘅箭靶。之不過，好似佢上次喺記者會話齋，會同同事共同進退，相信佢應該唔會覺得受委屈嘅。