中環出更：專業女性選舉 見證時代轉變
香港城市女青年商會日前舉行「2016香港時尚專業女性選舉」頒獎禮，卓妮於活動上見到和富社會企業會長李宗德（Joseph）同中華廠商聯合會會長李秀恒，兩人大談時尚專業女性。李宗德就話自細就喺女人堆中長大，童年時七兄弟姊妹入面已經係女多男少，佢作為家中少數男性已經一早習慣同女士相處，加上佢婚後生咗三個女，由佢當首席評審可以話夠晒資格。
講番心目中的專業女性，Joseph話其實以前同現今女性好多都非常專業，只係以前女性職業一般比較狹窄，曾有校長憶述當年畢業生多數都係從事三種職業，分別係老師、護士及家庭主婦，但現今無論律師或醫生等專業都多咗好多女性，見證住女性於唔同時代嘅角色轉變。
Joseph仲話，十幾年嚟啲比賽多數都係選「至叻媽媽」，現今就轉為選舉專業女性，透露佢媽媽當年都好時尚，由於英文比較好，不時都會負責見客，算係好難得。
李秀恒最尊敬媽媽
同樣係評審嘅李秀恒就話，最尊敬嘅女性都係媽媽，事關當年嘅媽媽個個都係一邊返工一邊湊仔，而佢媽媽仲成功培訓到佢哋細細個就識得買餸講價兼煮飯，真係相當唔容易。至於現代女性，佢認為除咗要喺自己專業入面表現得好之外，仲要適時回饋社會。
同場仲有得獎者葉致欣及其提名人草姬創辦人郭致因。葉致欣話，身為女士最難嘅係同時兼顧家庭與工作，記得剛生完一對孖仔嘅時候身體尚未復原已經要準備返回工作崗位，好在喺丈夫鼓勵下工作尚且順利，先可以堅持落去。
卓妮