中環出更：攞A未夠喉 媽打再進修中史
民政事務局前常任秘書長「媽打」李麗娟，前日現身香港青年協會嘅「一帶一路一友情」計劃之「背包行」體驗旅人活動出發禮，講起今次帶隊會途經好多佢都未去過嘅地方時，感到非常興奮，仲即場定咗一個目標要同隨團青年一齊識讀兼背熟晒咁多個地方名，仲透露十月會返港大進修中史。
好多細節都未聽過
呢日媽打全程由頭坐到尾，非常專心咁聆聽香港歷史博物館前總館長丁新豹嘅分享，講解有關「一帶一路」歷史背景等資料。媽打話，佢大學係修讀英國文學，雖然中學時中史攞到Ａ，但好多中史細節都未聽過，尤其「一帶一路」沿線國家及城市嘅資訊，都唔及丁新豹講得咁詳細同得意，所以令佢好有興趣。媽打更透露準備十月返港大進修中史，希望遲啲可以向其他年輕人分享。
媽打仲諗起學生時代未出過國，笑言畢業時都係去澳門咋！一直去到結婚先至真正第一次出國去菲律賓度蜜月，所以依家嘅學生非常幸福，應該好好把握機會。
卓妮