政情：美芬愛修圖 大輝笑誤導

最搞笑係講到近排令人噴飯嘅執相潮。近年科技日新月異，執相嘅技術亦層出不窮，近期有唔少議員喺宣傳單張上嘅樣，出現同真人相差好遠嘅美圖效果。大輝笑笑口話，近日收到某女議員嘅傳單，第一眼見到個靚女，仲以為有政壇新人，點知細看文字先至發現原來係議員梁美芬！

「代解畫」指公事繁重致變樣

大輝搞笑話，梁美芬可能近期公事繁重先令到到樣貌有變，但佢認為傳單同真人相差太遠，或會誤導市民投票喎！

不幸中槍嘅仲有議員王國興，佢曾發表出名嘅午餐肉論，話拉布一日浪費嘅公帑可買十六萬罐午餐肉，大輝就話，好少人日日食午餐肉，用午餐肉作比喻唔夠貼身，用公仔麵、雞蛋、蘋果呢類每日食用嘅嘢去形容仲好，咁市民先明白拉布嘥咗幾多公帑喎！

講起王國興，又點能夠唔講佢把道具鉸剪呢？林大輝話自己做紡織呢行，見慣剪布嘅鉸剪，所以見到王國興整把「軟瀨瀨」嘅鉸剪出來，就知佢係外行人，因為把鉸剪根本剪唔到布囉！不過都話明係道具啦，大輝又使乜咁認真呢？

不滿葉建源倡罷課打爛飯碗

數數吓，教育界議員葉建源亦不能幸免，作為林大輝中學校監及理工大學校董嘅大輝直言，最不滿葉建源成日叫學生罷課，講笑話係打爛佢飯碗，搞到無學費收。雖然大彈唔少同事，但大輝都唔係「百彈齋主」。佢就讚賞勞工界議員鄧家彪講嘢紮實平穩，論調有自己風格，認為係做實事嘅議員咁話。

除咗一眾議員，大輝亦不忘單打因為全港性系統評估（TSA）公聽會一役而結怨嘅教育局局長吳克儉（吳得掂），大輝話，近日行書展時買咗唔少佛學書籍，佢特別要向吳得掂推介一本書叫《工作好修行》，仲話旅行並非好修養喎！不過件事過咗咁耐，大輝若自身修行夠，都應該放下恩怨喇！