中環出更：名人「荔」玩高卡車
放暑假除咗陪小朋友玩，其實大人都可以玩埋一份。日前一班城中名人齊齊去亞洲國際博覽館嘅荔園，試玩首次引入香港嘅電動高卡車，到場有未玩過嘅新手，亦有業餘賽車手。荔園主席邱達根話，電動高卡車因為行電所以好靜，不過為咗製造氣氛，佢哋特地按唔同速度錄製相應引擎聲，令遊戲更加過癮。當有車撞到水馬或發生任何問題時，仲可以透過手機App即時截電，非常安全。
當日入場嘅有東華三院總理廖偉麟、卓能集團非執董趙式浩、菁英會主席盧金榮、青聯前主席范駿華、位元堂主席鄧清河兒子鄧灝康及保良局前總理李德剛等人。盧金榮一向喺朋友圈中被盛傳手車唔錯，原來佢當年於美國參加過業餘賽車比賽，不過就一直唔敢同阿爸盧文端講，只係話參加過運動比賽。不過自從返咗香港之後，莫講話賽車，連部私家車揸快少少都唔得，因為每次載兩個寶貝囡囡出入時，開快少少囡囡都會大叫「開慢啲！」或者「唔畀開咁快！」人肉限制住佢車速。
鄧灝康奪亞軍有天分
首次玩高卡車嘅李德剛同第二次玩嘅鄧灝康亦玩得相當投入，輪到佢哋同廖偉麟及趙式浩玩嘅期間，有參賽車撞到水馬，即時見到有工作人員示範「截電」將車速減慢，難怪邱達根話唔識揸車都可以放心玩。鄧灝康似乎有啲天分，只係第二次玩即拎到亞軍，不過問佢會唔會打算參加真正賽車時，佢即耍手擰頭，笑稱好怕死喎！
卓妮