中環出更：邱詠筠成功需同事
每個成功人士背後總有份堅持，早前世界傑出華人青年協會舉行首屆世界傑出華人青年大獎頒獎禮，卓妮見到其中一位得獎者帝盛酒店集團總裁及執行董事邱詠筠（Winnie），佢話無論工作或生活上都總會遇到曾經幫助過你嘅人，要懂得心存感激之餘，仲要畀對方知道你有一直記住佢，而有一班好同事互相支持更加係重要嘅成功因素。
除咗靠同事，堅毅嘅意志都係成功要素，觀瀾湖集團副主席朱鼎耀（Tenniel）就靠做運動鍛煉嘞！現時佢每日都堅持做運動健身，好似返工咁已經變成佢生活嘅一部分，除咗可以提升個人能耐之外，頭腦仲會特別靈活添！
朱鼎耀海口建水上樂園
朱鼎耀又話雖然市道唔好，但生意唔好時大家就會多咗時間打波消遣，生意好大家又會邊打波邊傾生意，所以對佢哋影響唔大，嚟緊佢哋仲會喺海口發展全球最大水上樂園吸客添！
咁經營高爾夫球場嘅Tenniel有冇收過朋友下戰書挑戰球技？佢就謙虛指自己球技一般，唔係職業水平，但間中都會同朋友玩吓切磋，同場另一位得獎者皇朝集團主席林奕權就曾經同佢一齊打過高爾夫球喇，難怪兩位現身活動時都充滿魄力啦！
至於經營汽車生意嘅得獎者劉兆樺就透露年輕時家境一般，所以十六歲開始就投身汽車買賣行業，佢對自己工作好熱衷，嚟緊十月喺香港舉行嘅國際賽車盛事Formula E佢都會親身參與。
卓妮