中環出更：漢奸黎仇家無數 再20人上門示威靜坐
反壹傳媒黎智英（漢奸黎）嘅怒潮一浪接一浪，由上個月開始，不停有唔同示威人士踩上門抗議。繼前日有同一批示威人士分別喺朝早同傍晚踩上漢奸黎寓所同壹傳媒大樓外面抗議，尋日又有廿名男女去到佢寓所門外抗議。示威人士除咗批評漢奸黎「黑金亂港」、「賣港求利」之外，仲直斥佢係「傳媒之恥」。
斥千古罪人賣國求榮
尋日中午時分，廿名示威人士由兩名青年帶領，步行去到漢奸黎位於何文田嘅寓所。佢哋手持寫上「黑金亂港」、「賣港求利」同「千古罪人」等嘅橫額同標語，同埋大叫「賣國求榮」、「害死人」等口號。
不過，今次班示威人士就無前日嗰班咁早散去，佢哋索性喺漢奸黎屋企門口靜坐，仲一坐就坐足兩個鐘先走。未知佢哋今次靜坐，係咪因為知道漢奸黎返咗香港，想「會一會」佢呢？
以往得罪人多嘅漢奸黎，由上月十日起，被示威者踩上寓所同將軍澳壹傳媒大樓外抗議嘅次數最少有二十次，而今次示威者聲稱係自發組織。咁多次示威當中，自稱霸王國際集團員工同苦主嘅佔九次、正義聯盟就佔三次、旅遊業界同其他人士就有六次。
卓妮