政情：泛民反枱 林煥光鬧爆「小學雞」

稱行政立法關係未算差

林煥光話，今屆政府在扶貧和建屋方面都有落實相關政策，並非一事無成或癱瘓，早前嘅版權修訂條例及最近嘅醫委會草案，原意係回應民意改善政策，根本不涉政治問題，相關業界亦已有共識，但偏偏去到「埋門一腳」，卻有政黨及議員因不滿某人做特首等政治理由，突然反枱由支持變為反對，為了部分既得利益團體，而不惜犧牲廣大市民利益。佢形容呢啲係「小學雞」、不負責任及不顧全大局嘅表現，令佢感到沮喪。

林煥光又話，以全盤觀察現時嘅行政立法關係，其實不算太差，今屆立法會審議嘅八十九條草案，至今已有八十三條通過。但佢承認現行政制存在結構性問題，在《基本法》下行政與立法本身就是對立，特首不能屬於任何政黨，政策或法案提交行會討論時亦已冇太多修改空間，希望下屆政府及下屆立法會可以更務實地合作，特首亦不能「一言堂」，要有同政黨妥協嘅意識。