政情：博懵食全餐 公文袋捉蟲

從未表態 鋪路抽水

醫委會改革草案初出台時，以民主黨為首嘅泛民黨派大多舉腳支持，認為有助改變醫委會「醫醫相衞」嘅問題，加快醫療投訴處理程序及加強保障病人權益。唯獨是口講捍衞公眾利益、實際就只顧維護專業特權及選票利益嘅公文袋，一直未有就支持或反對草案明確表態，疑似為日後左右逢源、兩頭抽水一早鋪定後路。

直至前日立法會就草案進行二讀表決時，公文袋居然同時出現三種投票立場，梁家傑、陳家洛、郭榮鏗及楊岳橋都投下贊成票，外號「正盲毛」嘅毛孟靜投了反對票，郭家麒就仲騎牆，投咗棄權票。原因好明顯，正盲毛身兼本土派組織「香港本土」成員，部分反對草案嘅醫生同網民，質疑政府改革醫委會係為將來大舉引入內地醫生鋪路，佢自然唔敢支持。郭家麒就仲簡單，佢本身就係私人執業醫生，初頭仲有份同醫學界議員梁家騮一齊點人數拉布，「醫醫相衞」呢句說話唔係得個講字嘅！

雖然公文袋嘅騎呢投票立場，對最終表決結果冇構成任何影響，草案仍喺大比數支持下通過二讀，但人民嘅眼睛係雪亮嘅，唔會咁輕易放過佢哋。有反對草案嘅網民，喺網上圍插該黨出賣港人利益，變相放晒啲大陸醫生落嚟香港醫死人。支持草案嘅病人組織，亦質疑該黨反對及棄權嘅議員，究竟係將廣大市民福祉行先，定係只顧保障醫生嘅特權同利益。其中楊岳橋就驚到要急急拍片放上網，解釋自己嘅投票立場，但對於其他黨友點投票，作為立法會新丁亦唔敢多講。

精神分裂 早有前科

其實公文袋已經唔係第一次精神分裂，過往就應否北上與內地官員溝通、《基本法》係咪容許特首選舉有「公民提名」等，都曾經有過不同立場，該黨立法會議員各自為政、你唔服我、我唔妥你，甚至公開互窒亦常有發生。隨着黨魁梁家傑退休，預計該黨喺下屆立法會將更為混亂同難以捉摸，分裂同內訌鬧劇隨時日日發生。