政情：卸任議員 (先刂)雞玩番夠本
立法會議員單仲偕（(先刂)雞）自九五年起擔任立法局議員，斷續做咗十六年，做埋今屆立法會就退下火線。講到卸任議員後嘅生活，佢話嚟緊一年會安排去五次旅行，希望喺明年七月前可以搵到份工，依家傾向返去商界工作，或者去大學做兼職講師教政治，但就冇興趣做政治公關。(先刂)雞透露，已經搵咗社聯行政總裁蔡海偉「掛單」，就算有冇人工嘅工作都搵佢做喎。
(先刂)雞話，九月中會先去日本九州玩兩個半星期，之後好大機會參與特首選舉委員會選舉，十二月就會去印尼潛水。明年初就會去美國探兩個囝囝，順便滑雪；三至四月就會去新西蘭南島玩自駕遊，到五月又飛返去美國，見證細仔大學畢業典禮。
好耐未試過搵工
玩完一年，(先刂)雞希望明年七月前搵到份新工作。佢講笑話，自己咁多年來只做過一份工，面試人就多，出去搵工就真係好耐都未試過，睇嚟要執執份履歷表喇。
咁(先刂)雞最深刻議會回憶係乜？佢話係九七年喺舊立法會大樓叫「重返議會」，而佢同期做緊葵青區議會主席，做兩級議會可以處理好多民生議題，好有成功感。