平等機會委員會多次被質疑浪費公帑，嘥錢豪租辦事處，該會於是打蛇隨棍上，要求購置永久辦事處。平機會尋日向立法會提交工作報告，係陳章明出任平機會主席後首份工作報告。
報告中就再次死(舌累)設置永久辦事處嘅要求，話過往想購買永久辦事處都因為資源問題唔成功，認為長遠都係要搬去由政府提供嘅永久辦事處，希望政府緊急優先處理喎。
平機會死(舌累)永久辦事處可能都同佢哋入不敷支有關。平機會報告指出，二○一六／一七年度會有結構性赤字，儲備結餘估計會由去年三月底時嘅二千一百萬元跌至一七／一八年度嘅五百四十一萬元，而一八／一九年度儲備將完全耗盡，仲會有六百九十萬元不敷之數。
不過，使得錢多，就唔代表做嘢多咗或效率高咗嘅。平機會去年處理近一萬四千宗查詢及八百多宗投訴，相比前年，就分別少咗近五千宗及一百多宗，而去年經佢哋調解嘅個案，調停率為六成七，亦較前年七成三低。唔知咁嘅成績，班立法會議員仲肯唔肯支持平機會嘅要求呢？