政情：律師會混血副會長以英語溝通
香港律師會剛完成年度改選，副會長蘇紹聰（Thomas）「升呢」擔任會長，理事黎雅明就成為副會長，副會長彭韻僖則冧莊，新班子尋日齊齊亮相。黎雅明個名聽落似係中國人，但其實佢係阿拉伯及印度裔混血兒，相信係律師會多年來首名混血副會長。好多香港人會以為外國人唔識聽廣東話，喺背後講人壞話，但Thomas表明，黎雅明識聽識講八成廣東話，尤其係廣東話壞話，大家即刻「笑咗」。
黎雅明話，佢生於英國，八九年來港，九五年起參加律師會小組委員會，○四年起任理事至今，資歷深厚。雖然佢太太係印度人，但亦識廣東話，兩名子女都喺本地讀書，一家人不時以廣東話交談，睇中文電視台。不過，佢就唔識書寫中文，廣東話都仲有口音，所以暫時多數以英文溝通。
對於最近有法律界人士話香港法院面臨前所未有嘅挑戰，Thomas就話，或者同近年市民將爭議帶往法庭解決有關，亦有人因不滿法庭裁決作出過激行為，重申如對裁決不滿，應該透過上訴處理。