中環出更：馬斐森自評：掌港大表現六分
香港大學近年不斷捲入政治風波，校長馬斐森來港唔夠半年，就接連發生佔領行動、港大法律學院副教授戴耀廷涉收匿名捐款、法律學院前院長陳文敏遴選副校長，以至行政會議成員李國章出任港大校務委員會主席等爭議性事件。馬斐森日前接受傳媒訪問時，強調與李國章關係良好，喺工作評分上給對方九分；但畀自己就只有六分，原因係佢未能釋放港大嘅潛能喎。
馬斐森話，來港之前已經知道香港政治環境複雜，又形容佔領行動係佢喺港大嘅黑暗歲月，感覺困難同充滿挑戰。而令佢感意外嘅係，每次港大舉行校委會會議，都吸引大量傳媒採訪同報道，唔知係咪曝光率太高，連的士司機都認得佢喎。
稱與李國章關係好
雖然外界一直傳佢同李國章關係欠佳，但佢就話二人關係良好，畀九分係因為對方曾發聲明指唔會干預港大校政。至於個人評分，佢話自己仲有唔少地方要改善，所以只係畀六分。佢又話，依家講續任係言之過早，因仲要處理往後三年嘅工作，包括落實港大「亞洲國際大學」嘅十年藍圖等。
卓妮