中環出更：議員質疑一帶一路交流搵命博
公民教育委員會近日推出「一帶一路」交流資助計劃，資助青年到一帶一路沿線國家交流，近至新加坡、遠至烏克蘭等地都有，但亦不乏敍利亞、伊拉克、阿富汗等戰亂國家，為咗交流係咪值得「走過烽火大地」值得商榷。到訪過阿塞拜疆、巴林等沿線國家嘅立法會議員葛珮帆（EQ）坦言，交流團每人每日最高資助約一千三百元唔算多，加上香港對敍利亞等地發出唔同外遊警示，好多時買唔到旅遊保險，認為政府想推動學生出國交流，都要提示學生邊啲國家有戰亂、疾病風險，否則得不償失。
資訊科技界議員莫乃光（Charles）亦都質疑，有冇必要鼓勵青年親身到訪阿富汗、伊拉克等地交流，如果只係到訪嗰度十日八日，「不如睇多幾套相關嘅紀錄片好過」。佢仲話唔少歐美國家為防範恐怖分子入境，護照上假如顯示去過敍利亞等地，一定會被歐美入境部門查問，相當麻煩。不過，佢建議有條件嘅話，同時申請兩本護照，一本專門去「烽火大地」，一本就出入境普通國家，咁就冇咁容易被查問。去一次沿線國家交流都咁麻煩，政府真係要諗諗計吸引學生至得。
公民教育委員會委員葉振都承認，一帶一路之中有部分國家未必好安全，現時只係試驗性質，按唔同團體選擇去唔同地方，但有旅遊警示嘅國家一定唔會去，亦會睇相關地方有冇當地團體接待先放心。
趙家賢解畫「有保險」
另一名公民教育委員會委員、東區區議員趙家賢就話明白計劃包括黑色旅遊警示嘅國家，公眾同埋網民都會好關注，而呢個計劃唔係畀個人申請，係畀學生、年輕人機構同組織申請，主動權都係喺呢啲機構，機構亦需要自行負責保險事宜，機構要確保有保險，委員會先會考慮批出資助咁話。
卓妮