今屆立法會即將踏入尾聲，政府排咗財政預算案以及廿二條法案，希望立法會盡快通過。據了解，政府目前最迫切通過嘅就係有關接收東隧嘅《東區海底隧道法例（修訂）條例草案》，以及近日決定讓步嘅改革醫委會《醫生註冊（修訂）條例草案》，面對泛民無日無之嘅拉布，唔知主理兩條法案嘅運輸及房屋局局長張炳良和食物及衞生局局長高永文，會唔會有得震無得瞓呢？
其中有關東隧嘅法案，有關條例係同東隧收費有關，因為一日法案未通過，政府都無權收取隧道費，唔少車輛會改行東隧，隨時會導致港九大塞車。
至於醫委會改革法案，雖然唔會有不可逆轉影響，但據聞盡快通過係為咗加快醫務聆訊審議時間，改善醫學界被指「醫醫相衞」，並為引入更多海外醫生，紓緩醫生不足。倘若兩條法案都未能通過，就要待下屆立法會由頭開始審議，隨時要再耗時一至兩年。
雖然立法會主席曾鈺成尋日已大幅削減泛民議員嘅預算案修正案，但拉布議員就講明，佢哋之後或會於民生法案發起議會抗爭，唔知政府嘅如意算盤打唔打得響呢？
卓妮