中環出更：CY「游」出國際 淪外媒笑柄
特首梁振英（CY）早前提出於中環興建泳棚或釣魚區，讓上班族午飯時間可以游泳或釣魚，引起各界熱議。連英美傳媒也紛紛報道此事，又質疑維港水質受嚴重污染，係咪適宜游水同釣魚，又提到食飽飯係咪適宜游水，又指喺中環買飯已經排隊需時。CY今次真係鬧出國際笑話！
不過，遠在北京出席兩會嘅全國人大代表兼立法會議員田北辰（田二少）竟然盲撐CY的建議，在社交網站上載照片，指自己親身測試過一小時內係咪夠時間食飯兼游水，結果「係得嘅」。不過，原來所謂「係得嘅」，是要游水後才進食，還唔食飯改食生果，兼且唔沖涼先至夠時間游水，在泳池游完水唔沖涼仲勉強可以，但落海游水不沖涼就相當邋遢喇！
田二少盲撐 游完唔沖涼
田二少解釋，佢喺北京飯店嘅泳池內游水二十分鐘，之後無沖涼，抹乾身就去飯店嘅餐廳食生果當飯。所以打工仔要喺午飯時成功游泳，最重要係公司附近有泳池，游完唔沖涼抹一抹，仲要食自攜食物。話明係午飯時間，如果為咗游水連飯都唔食，莫非游水當飯食？
卓妮