政情：「戴」領選舉分餅仔遭圍插
港大法律學院副教授戴耀廷於前年發起持續七十九日佔領行動，不過戴耀廷於佔領滿月已自行退場，究竟學界、社運界有幾聽戴耀廷支笛，答案不言而喻，但戴耀廷死心不息，自以為有光環可以指指點點，早前又撰文發起「雷動計劃」，目標係非建制派於九月立法會選舉奪取過半議席，今次外界反應比上次更為冷淡，除咗潑冷水外，戴耀廷尋日同主流泛民、本土派代表同場時更成為眾矢之的被圍插，一度被諷刺計劃旨在「泛民分飯票、分餅仔」，認真唔留情面。
戴耀廷提出「雷動計劃」多時，尋日同熱血公民成員鄭松泰、民主黨總幹事林卓廷等人同場辯論，佢起初解釋計劃時話，每個選區須招募一萬至二萬名選民，承諾會策略性投票，由當區義工根據民調，投票當晚公布邊隊名單有機會當選，至於暫時唔夠票嘅名單，就呼籲該批選民集中票源支持。
配票計劃 一文不值
不過，戴耀廷呢個憑空想像嘅計劃，未有落實時間表已被批至一文不值，鄭松泰表明絕對唔認同計劃，認為冇提理念，形容係「泛民分飯票、分餅仔」，即為咗分議席而做，重申佢哋提出當選議員後立即辭職，變相公投就可以為選民提供選擇。
分屬主流泛民嘅林卓廷（阿廷）亦加入質疑該行動，指戴耀廷提出計劃嘅出發點係好，但有好多操作問題仍未解決，好似究竟點樣可以透過民調顯示邊張名單係有機會夠票當選，一旦操作唔理想，隨時夠票名單變成唔夠票，唔夠票名單幫咗都仲係唔夠票。阿廷其後又向鄭松泰「開火」，稱本土派協調就為理念，傳統泛民協調就係為「飯票」，質疑係雙重標準。
具體操作 拖得就拖
面對多方質疑，特別係關於具體操作問題，戴耀廷解釋時輕描淡寫，話若果係認同理念嘅話，技術問題唔係解決唔到，指會於四、五月視乎最新進程，決定係咪付諸實行。
另外，戴耀廷被揭同本土民主前線梁天琦係舊相識，有網民提供照片力證二人曾同枱食飯並合照，翻查資料顯示，該張合照拍攝於二○一三年十一月，戴耀廷出席港大利瑪竇堂高桌晚宴擔任嘉賓，梁天琦亦係座上客。