中環出更：創意加努力 省靚港品牌
香港品牌發展局（品牌局）日前舉行品牌選舉頒獎典禮暨慶祝晚宴，好多得獎企業代表濟濟一堂，包括銷售涼茶為主嘅鴻福堂主席謝寶達。謝寶達話，為咗吸引多啲年輕人幫襯，近年佢哋不時推出限定卡通產品供市民換購，又頻頻推出不同口味的糕點及小食，希望擴闊客源。品牌局主席黃家和就話，市道差，企業更加要加強宣傳以保持實力，省靚個招牌。
除咗涼茶，需要年輕化嘅仲有中國茶。榮源茶行銷售及市場推廣經理王詩雅就話，近期公司開辦茶文化課程，教大學生如何分辨茶葉，同埋點樣泡茶，希望推廣茗茶文化。此外，亦將茶包重新設計，走黑色型格路線，仲分開細細包，方便上班一族返工時飲用，唔使怕大包裝飲唔晒會潮濕。
龍獅團生意逆市上升
獲獎嘅仲有夏國璋龍獅團，「一代獅王」夏國璋兒子夏德建與同樣熱愛舞獅的新抱歐陽秀明（Tiffany）一同出席領獎。Tiffany話，農曆新年自然多人請獅隊出動助興，不過其實依家市道差，佢哋更加忙碌，事關商界會特別希望請佢哋嚟帶旺個場，加上近年唔少外國人都非常有興趣學習舞獅，佢哋又出埋自己品牌嘅藥酒，所以整體生意不跌反升。
泉昌公司出產的雙喜牌百花蜜及正冬蜜亦獲得香港品牌獎，泉昌董事副總經理黃楚恒笑笑口話，保持產品質素穩定相當重要，所以佢每朝都會沖蜜糖水飲，順便監控住品質喎！
卓妮