政情：橫額陰沉色 即時換「新」

狄志遠囝囝越洋投訴

Dick解釋，原本的宣傳品係集體構思，本來用黑白灰顏色係希望帶出浪漫效果，冇諗過會唔吉利。收到投訴後，佢自己夜晚望到啲橫額都覺得「有少少咩」嘅感覺。佢仲自爆，呢件事仲驚動埋身在英國嘅囝囝，越洋來電投訴。搞成咁，Dick尋日就開記招交代件事，仲一度鞠躬向公眾道歉。

新思維唔止搞錯橫額，連採訪通知都出錯，搞到有記者去錯地方。好彩有記者提醒阿Dick，佢就即刻通知所有記者，又推遲記者會開始時間，等記者唔使撲個空。今次新東補選候選人除咗黃成智，仲有民建聯周浩鼎、公民黨楊岳橋、本土民主前線梁天琦、獨立方國珊、梁思豪及劉志成。