中環出更：名媛網購靚衫 「麒」望執平貨
零售市道差加上天氣反常，今年冬天時裝零售業真係被玩殘，不過原來高消費力嘅名媛都唔一定喺香港買衫。早前香港百仁基金舉行就職禮，遠東發展主席邱達昌女兒邱詠麒（Josephine）都有到場，佢話最鍾意上網買美國衫，事關平好多，就算尺碼唔啱寄返去換都唔使另外加錢，加上不時減價，計落就更平更方便。
Josephine話，佢間中都會喺香港舖頭買衫，不過最怕同人逼，所以通常未減價就睇定先，減價時就可以直接買，唔使試。真係幾聰明喎！
楊立門大展歌喉掀高潮
講番就職禮，理文造紙主席李文俊第二次連任主席，佢太太黃敏儀梗要現身為佢打氣。香港大學醫學院院長梁卓偉及民政事務局前常任秘書長楊立門就一彈一唱，表演兩首英文歌，為晚會掀起高潮。
同場仲有全國政協常委余國春及升呢做基金副主席嘅兒子余偉傑（Andrew）。近排天寒地凍，Andrew話，最緊要買件棉衲，保暖之餘，出差時放入篋都唔怕皺。有時佢會加多件長衫及頸巾，成個上海灘少爺咁款，外國人都讚佢型喎！
行政會議成員林健鋒（Jeffrey）同兒子林凱章（Victor）都有到場，Victor早前被撞破同前女主播把臂遊台北，卓妮梗要同佢道賀喇！點知Victor表現避忌，就算Jeffrey開聲叫佢一齊合照，Victor都唔肯行埋嚟，轉個頭仲唔見咗人，唔知係咪怕醜呢？
卓妮