政情：周伯展批醫局「大白象」
公立醫院高級醫生額外加薪風波暫告一段落，但有醫學界人士認為呢個係醫管局長期管理不善嘅惡果，今次加薪只係平息咗表面問題，治標唔治本。香港醫學會副會長周伯展話，六年前經濟唔好，醫管局跟隨公務員減薪，從此好多人都產生誤解，以為醫管局同公務員嘅薪酬掛鈎。佢所理解，醫生角色應該類似外判，薪酬待遇應該好過公務員。講到尾，佢認為醫管局前行政總裁蘇利民應該為醫管局行政混亂問題負責。
周話，醫管局係要做好公立醫院統籌及管理，可惜並無發揮作用，反而變咗大白象，就好似今次醫管局動用儲備解決加薪問題，但剩餘嘅儲備又未必夠應付日後所需，可能影響市民及打擊員工士氣。
倡設委會檢討系統
佢提議，應該成立一個由業界及非業界組成嘅委員會，檢討整個醫管局系統，完成檢討後就解散委員會。問到醫委會係咪都應該有類似檢討，本身係委員嘅周伯展就避重就輕話，醫委會本身已有一班專業醫生監察。