哈囉喂就快到，《男極圈》搵嚟四位「妖魔鬼怪」陪伴大家，第一位登場嘅囡囡，嚇人招數就係蟲蟲，原來日本寫真偶像獨角仙尤加莉，除咗鍾意飼養昆蟲，與蟲為伍，仲成日打扮到好似森林小妖精咁宣揚愛護大自然同養殖昆蟲嘅樂趣添！唔知大家見到呢位小妖精，會係驚定喜呢？
日本寫真偶像除咗會以童顏、巨乳、巨尻嚟作為賣點之外，部分仲有其他特點，好似以巨尻聞名嘅倉持由香咁，因為佢成日都會將自拍性感照放上博客，故被稱為「寫真自拍部部長」，至於今日為大家介紹嘅呢位獨角仙尤加莉就被稱為蟲偶像，因為佢嘅一生以及演藝生涯都同昆蟲有莫大關係。今年26歲嘅尤加莉比起好多同年女仔都生得青春活潑，面上一派稚嫩氣息以及天真甜美笑容，睇落同十來歲妹妹仔冇分別，個人相信再過十年，佢個樣都唔會有咩大變化。除咗面孔青春，整副身材亦同樣散發青春光芒，雖然上圍只得對C奶，但係全身都係雪白鮮嫩嘅優質肌膚，加上身上冇多餘肥肉，身材誘人味濃郁，好一隻白色小妖精！
話尤加莉係小妖精完全冇錯，因為由阿妹踏入寫真界以來，無論拍寫真定係出席活動，背部都有一對翼，原因唔係佢飲咗某能量產品，而係扮成森林小妖精以表示自己熱愛昆蟲同愛護大自然。尤加莉自小跟媽媽玩園藝，從而對昆蟲產生濃厚興趣，後來更熱愛養殖昆蟲，據講佢家陣養咗500隻咁多！阿妹加入寫真界同養昆蟲都有關係，高中畢業之後，尤加莉喺一間地產公司做文員，得閒就寫博客同大家分享養蟲心得，漸漸成為養蟲名人，及後被藝能事務所睇中，將佢簽為旗下藝人，更封為「昆蟲偶像」。尤加莉表示，加入藝能界除咗想搵錢，仲希望可以參加電視台嘅旅遊節目，趁機會去亞馬遜森林等地方接觸更多昆蟲喎。
簡介：獨角仙尤加莉成日都會喺博客公開養蟲心得，想了解及分享箇中知識，同時想養番條蟲蟲，不妨Click入去慢慢睇啦，包你大開眼界。
網址：http://ameblo.jp/kabutomushi-yukari/
年齡：26歲
身高：5呎3吋
三圍：32C-24-34
撰文：賢