成語「禍從天降」比喻災禍突然發生，而喺香港，禍從天降唔止係一種比喻，而係殘酷現實，一個唔好彩，隨時中頭獎。唔係嚇你o架，港府拆除都市炸彈歎慢板，搞到危機四伏，唔係塌樹就係塌樓，唔係空中飛窗就係招牌倒冧，奇災巨禍隨時從天而降！
嗱，有政黨上月巡查深水埗、沙田、南區等八區共九十條街道，發現一百一十七個廢棄及危險招牌，其中深水埗有二十六個，北區有二十五個，油尖旺區有二十四個，梗有一個喺左近。危險招牌形形色色，有啲支架嚴重生銹而蓉蓉爛爛，有啲被僭建多個招牌而超負荷，有啲嚴重破損及光管外露，有啲更加因為店舖倒閉多年而慘變「無主孤牌」，日久失修，搖搖欲墜，睇到都牙煙喇。
點解危險招牌無處不在？調查機構係咁講嘅，油尖旺等舊區多三無大廈，無法團、無保安、無管理，就算有人喺大廈外牆非法搭建招牌，亦無人跟進；至於有法團嘅大廈，因為唔想承擔巨額清拆費用，亦往往置之不理，所以咪搞到危險招牌遍地開花囉。調查機構認為，當局有必要設立招牌登記制度，物主及承建商需要為危險及非法招牌負上刑責，咁至可以提高阻嚇力，令都市炸彈自動消失。
講到呢度，不得不同港府算一筆帳。話說○八年灣仔發生冧招牌奪命慘劇，當局急急補鑊下令清拆全港僭建招牌，當時貪腐醜聞仍未曝光嘅前特首曾蔭權爵士仲係威係勢話要以拆招牌創造就業添，點知多年過去，招牌炸彈無消失不特止，反而不斷惡化，你話港產官僚係咪做嘢o架？不可不知，現時全港約有十二萬個招牌，好多已經日久失修，甩皮甩骨，政黨踢爆逾百個危險招牌，只不過係冰山一角嘅咋！
咁講喇，要拆除招牌炸彈，設立監管制度固然重要，但更重要嘅係官僚必須改變敷衍塞責嘅陋習，否則，就算有制度都係嘥氣嘅咋。呢，當局推出嘅「違例招牌檢核計劃」就係雷大雨小嘅例子喇，話就話鼓勵物主檢查及加固招牌，實際係變相縱容危險招牌，推出兩年以來只接獲二百幾宗申請咁大把，佔全港招牌一個百分點都唔夠，簡直得啖笑。無計喇，學政黨話齋，有關計劃既缺乏誘因，亦缺乏阻嚇力，無論申唔申請都好，照樣危險招牌高高掛，咁又點會有成效呢？大家話嘞，港府拆招牌炸彈得個講字，係咪草菅人命吖？
講多無謂，食多會滯，行動最實際。港府連拆招牌咁小嘅事都做唔到，寄望佢哋管治好香港，同緣木求魚無乜分別。不如咁喇，當局自動拆走「民生無小事」塊招牌，無謂篤眼篤鼻有礙觀瞻吖嘛！