政情：公民講場：選民登記 「馮」古怪都查

土地問題真係無處不在，就連選民登記都受住屋環境影響。選舉事務處上月公開選民登記冊，發現約有十名選民以公園、燈柱及文化中心等公眾地方作為登記住址，選舉管理委員會主席馮驊都承認呢啲選民地址有古怪，但就解釋係因為香港居住環境複雜，有唔同嘅房屋問題，先至搞成咁喎。佢話，就算無傳統居所，呢啲人嘅選舉權都唔可以被剝削，選舉事務處會核查每個古怪嘅選民登記地址，亦會向第三方查證。