政情：今日你上鏡：遊馬爾代夫 施榮懷家庭樂

中華廠商聯合會永遠名譽會長施榮懷（Irons）卸任廠商會會長後，依然忙個不停，早前見佢出席一個關於「一帶一路」嘅論壇，曬到一身古銅膚色，原來佢去咗馬爾代夫享受家庭樂，玩足六日五夜，難怪雙手都曬到甩皮喇！Irons充完電後就要繼續忙，除咗要處理好公司事務外，本月中又要陪伴升讀大學一年級嘅囝囝飛去美國洛杉磯開學，仲要抽時間同兩個弟弟慶祝，包括二弟施榮忻獲委任為全國青聯副主席，如此看來，以前做會長咪忙上加忙？