政情：最愛建築物 市民專家大不同
半年前舉辦嘅「十築香港」投票，畀市民同專業建築師分別揀出歷年最愛嘅十大香港建築物，原來兩組結果分別極大！市民揀出嘅十大建築包括山頂纜車、海洋公園等，但專業建築師就揀出有五十年歷史嘅彩虹邨、沙田穗禾苑等，結果係南轅北轍。香港建築師學會會長吳永順（Vincent）話結果令人意外，估計市民以感情作投票準則，而建築師則思考建築物美學、當年建築技術等，先會令到結果咁大出入喎。
對於本港年輕建築師嘅發展，Vincent就話年輕人嘅發展機會太少，因為香港地盤規模和項目愈來愈大，變相客源減，工作只會落入資深建築師手中，所以建築業每年都會舉辦唔同展覽，畀機會年輕建築師發揮，幫佢哋維持團火，唔好咁易心淡轉行。
羅永暉批佔中年輕人激進
資深作曲家羅永暉就對年輕人都有意見，批評參與佔中嘅年輕人激進、躁動。不過，佢話班年輕人嘅表現正正反映出有自我覺醒，假以時日對香港嘅發展一定會有貢獻。佢仲樂觀話，香港並唔係走下坡，而係醞釀緊一個大時代，希望承佢貴言啦！