中環出更：陳恒鑌否認建制政府夾戲
立法會上月底舉行房屋事務委員會，有議員提出引用《立法會（權力及特權）條例》（特權法）調查多個屋邨嘅食水被驗出含鉛量超標一事，但喺建制派護航下遭否決。事隔唔夠一個月，當日有份否決引用特權法嘅民建聯（民記）忽然轉口風，話如果政府八月前唔公布獨立調查委員會嘅名單，就唔排除支持引用特權法調查鉛水事件。不過，有傳政府最快會喺今個星期內公布委員會任命，民記呢個舉動隨即惹來同政府夾埋做戲嘅猜測。
快將公布調查委員會名單
民記議員陳恒鑌（Ben）尋日接受電台訪問時，被問到佢同民記係咪一早收到風，知道政府就快公布名單，於是夾埋做呢場大龍鳳，從而製造出「成功爭取」。佢就否認做戲，強調無收到任何消息，又話如果政府短期內能夠成立調查委員會，立法會就未必需要調查，如果政府跟進未到位，立法會先引用了相關權力，以免調查「疊床架屋」喎。
好似民記主席李慧琼（Starry）喺上月特首答問大會，指收到大量市民同區議員投訴，過去一段長時間街道清潔做得唔好，當局會否推動全港性清潔運動，呢頭講完，特首就宣布會推出全城清潔運動。唔單止咁，月初阿Ben又同另一名民記議員何俊賢牽頭搞地區清潔宣傳活動，咁多事件加埋一齊，係咁啱定夾埋真係得佢哋先知喇！
卓妮