中環出更：黃友嘉話通訊App難保密
建制派於政改表決時發生世紀「大甩轆」事件，而表決當日嘅WhatsApp群組對話內容，更揭露建制派嘅溝通混亂情況，惹來全城熱議。當日有喺港區人大代表WhatsApp群組留言嘅積金局主席黃友嘉，尋日出席活動時話還未睇事件嘅相關報道。
不過，相信佢唔使睇都知發生緊乜事喇。佢話，現時即時通訊群組私隱保密程度有限，何況建制派群組有成幾十個成員咁多，更加難知道係邊個同幾時洩漏消息出去。
「預咗講嘢小心啲」
咁佢會唔會因為今次事件而變得好小心或驚咗唔再用WhatsApp？佢就話，呢啲群組始終都有佢哋嘅作用，如果唔用咪轉用WeChat（微信）囉，但若群組入面有咁多人，始終都好難保密，佢都會預咗講嘢要小心啲。對於有泛民主派議員批評立法會主席曾鈺成加入建制派群組討論，違反中立原則，黃友嘉就話唔評論喇。至於政改方案因建制派離場而被大比數否決，佢就認為係建制派嘅失誤，但邊個要負責佢就唔回應。
卓妮