中環出更：有口話「唔克儉」議員竟偷師外訪
有「吳得掂」之稱嘅教育局局長吳克儉近年花公帑外訪已為人詬病，仲成日喺立法會被一眾議員指摘，但唔少立法會議員都係只識話人，唔識話自己。立法會教育事務委員會計劃喺九月下旬到德國及瑞士考察七日，目的係研究當地職業教育政策和推行經驗喎！
教委會擬考察德瑞
據教育事務委員會秘書發畀廿七個委員嘅立法會文件顯示，委員會將喺九月二十日至廿六日去德國及瑞士訪問，研究人哋嘅職業教育及培訓，點樣為年輕人提供有效升學或就業途徑，仲有研究當地政府、學界及商界等持份者喺職業教育方面擔當乜嘢角色，以及點樣協作，又話順便了解當地幼稚園教育和融合教育添！初步估計，如果坐飛機商務客位，每位議員開支約五萬元，若坐經濟客位則為二萬七千元。
吳得掂早前被議員批評佢自上任以來頻頻外訪，於兩年半內外訪次數超過廿次，使費多於三百六十萬元，變成「遊埠局長」。但議員鬧人就大大聲，自己咪又係一樣浪費公帑。
卓妮