中環出更：創出養魚哲學栽培員工
內地人才冒起，香港競爭力備受考驗，要留住人才，考起唔少大企業老闆。有「錦鯉大王」之稱嘅寶光實業（國際）主席黃創增（Joseph）使出一套「養魚哲學」，落足眼力發掘「非池中物」，加以悉心栽培，令價值爆升。大家樂集團主席陳裕光（Michael）就掌握員工性格特質，派到不同崗位，減少錯配情況。
管理專業協會企業管理發展中心日前喺金鐘舉行周年晚會，Joseph帶頭分享管理心得，佢話養魚如同管理公司，想成功，離不開「用心培養，持之以恒」。
喜做「伯樂」 發掘優秀者
養魚二十二年，Joseph曾奪多個錦鯉比賽大獎，旗下名魚身價高達千萬港元。不過，佢堅持唔買貴魚，反而四出尋寶，發掘「潛質魚」。對於管理公司四千多名員工，Joseph亦喜做「伯樂」，發掘優秀員工加以培訓。
陳裕光：員工分四類管理
身兼企業管理發展中心常務委員會主席嘅Michael，都自創一套管理員工心得。佢話員工大致可分為四類人。第一類係「火車司機」，愛紀律；第二類係「醫生」，有敏銳洞察力；第三類係「農夫」，重視提高生產力；最後一類人就係「漁夫」，愛冒險。作為CEO（行政總裁），就要認清員工特質，知人善任，否則錯配工作崗位，僱傭雙方都唔會開心。
不過，時代節奏變得快，管人難度亦大增。俊和發展集團聯席主席彭一庭（Dominic）坦言，時下青年不輕易順從，好似獲公司派差內地，都會要求先同家人商量才決定。為免流失人才，Dominic只好順勢而行：「我喺地盤工作環境都加設羽毛球場，等同事返工都返得開心啲。」