中環出更：港大生北上交流 校友力撐
香港大學擬規定學生須參加最少一次內地及其他國家交流計劃，副校長何立仁早幾日回應學生不願到內地交流嘅想法時指如不想去內地，就不要來港大，令學生嘩然。身為港大校友嘅食物及衞生局常秘謝凌潔貞尋日出席活動時指，當年做學生，社會資源冇咁充足，能去澳門已十分開心，莫講話去其他地方。
香港賽馬會尋日舉行社群日盃賽活動，撥款五億元推行「賽馬會青年生涯規劃」幫助青少年尋找未來職業方向。
謝凌潔貞質疑「洗腦論」
卓妮於活動上見到謝太，傾到學生唔肯去內地交流時，謝太指明白現時學生擔心往內地嘅係「洗腦團」，因此較抗拒，但佢反問如果咁易被洗腦，係唔係去一次中東就會變咗信奉伊斯蘭教？而每去一個地方都被洗腦一次？佢認為出國或到內地交流都好，只係增加學生嘅見識及經歷，提高自身批判能力。
馬會大董陳南祿都係港大校友，佢指唔清楚何立仁當時語氣，但猶記得當年要出國有俗稱「四海包機」，旅行社將航空公司賣剩嘅機票包起賣畀留學生，而佢首次出國唔係坐飛機，而係大學時於船上實習四個月，途經菲律賓及新畿內亞等地，暈船浪嘔足四個月，但當時有機會實習已非常難得，不能有太多要求。
陳繁昌：毋須硬性規定
同場仲有社福界人士狄志遠，佢認為中港矛盾係導致部分年輕人唔想到內地嘅原因，但其實只要細心解釋到內地交流嘅好處，學生未必咁反感，因大多學生「受軟不受硬」，當以一個規則去強迫佢哋去嘅時候，學生反而變得不情願。
科技大學校長陳繁昌則指不便評論港大嘅做法，但現時超過九成學生都會到內地或海外交流，認為毋須硬性規定喎。
卓妮