中環出更：港島擬削議席 阿王似打定輸數
早前有消息透露，一六年立法會選舉會因應各區人口變化，港島區預計將會減少一席。工聯會港島區立法會議員王國興（阿王）今屆先由新界西成功轉戰港島區，如果港島區減一席，會唔會令佢嘅議席危危乎呢？阿王就話，如果政府要減議席都冇辦法，佢會好珍惜喺立法會嘅每一日，每一日工作都係倒數咁話。講到咁，唔通佢已經打定輸數？
話珍惜立會每一日
阿王今屆立法會選舉由新界西轉戰港島，憑住佢日以繼夜、夜以繼日反「拉布」，令佢曝光率增加，終能險勝。不過，如果將來港島減一席，相信競爭將大大加劇，加上佢哋嘅超級區議員陳婉嫻至今仍未表態係咪退下火線，所以阿王將何去何從仍然係未知之數。唔怪得阿王尋日出席工聯會嘅選民登記宣傳活動時，就話「有啲嘢唔係主觀想點就點」，要珍惜喺立法會嘅每一日啦！
卓妮