多個團體尋日下午發起「光復元朗」行動，元朗十八鄉鄉事委員會主席梁福元尋日早上接受傳媒訪問時，再三呼籲示威者喺遊行期間保持克制，表明如果有人故意挑釁生事導致衝突，相信警方會果斷執法。佢又提及，雖然村民已經決定取消反擊示威行動，但唔排除個別村民見到示威人士作出「挑逗性行為」，會把持唔住作出反擊。「挑逗」同「挑釁」只係一字之差，但意思卻差天共地，莫非喺梁福元字典入面，「挑逗」同「挑釁」嘅意思係差唔多？
