時下唔少後生仔都有用社交網站嘅習慣，財政司司長曾俊華（鬍鬚曾）直至上月底發表財政預算案前夕，先喺facebook（面書）開設個人帳戶，佢尋日喺網誌大談面書用後感，自嘲依家先用面書，相信好多人都會笑佢out（過時）。佢又自爆，面書係由幾位年輕同事代理，但他不時都有睇番市民嘅留言，形容過程相當有趣。
鬍鬚曾開設面書疑似想同後生仔打成一片嘅同時，骨子裏仍有懷舊嘅一面。佢喺網誌中提及《星空奇遇記》中飾演「冼樸」一角嘅美國老牌演員Leonard Nimoy逝世，自言雖然唔係狂熱《星空》迷，但當年都有同弟弟追電視，大讚《星空奇遇記》係上一代人嘅集體回憶。
鬍鬚曾推介後生仔重溫第一輯《星空奇遇記》，又話大家以今日標準，當年嘅特技可能係一個笑話，但如果大家代入「冼樸」嘅世界，體會佢勇闖前人未至之境嘅氣魄，可能會有另一番感受。