政情：「國王」廢鑊發爛渣
平等機會委員會（平機會）主席周一嶽（周一鑊）早前被本報踢爆，竟然喺未有充分諮詢其他平機會委員之下，自把自為建議喺平機會架構下加設月薪超過十六萬元嘅營運總裁一職，被質疑濫用權力「自肥」，引來公眾嘩然。事件爆煲之後佢一直都未見影，到尋日終於現身出席活動，全程「笑騎騎」，但一提到「營運總裁」時，佢就即刻黑口黑面兼發爛渣，解釋更係斷章取義。
被質疑自肥 拒回應
周一鑊喺公關擋駕下，「嬲爆爆」走向電梯口，被人問多兩問，佢面色即刻由黑轉紅，更氣沖沖拋出一句「營運總裁係評審委員會同立法會多年來一直爭取嘅，無嘢再回應喇！」跟住就急急腳走人。至於自肥一事，佢就拒絕回應。點知到咗傍晚，平機會竟然發聲明，話民政事務局同審計署早年檢討後都分別建議將平機會主席同行政總裁兩個職位分拆，互相制衡，所以平機會建議重設「營運總裁」一職喎。
點解平機會加設營運總裁一職有咁大爭議呢？事關現時月薪高達二十三萬元嘅周一鑊本應兼顧平機會嘅行政同營運兩項重要工作，如果特別請個長設嘅營運總裁職位負責行政管理工作，咁周一鑊工作量將會減少一大半，但人工就無減；同時佢又好大機會因平機會開支增加而減下層員工薪酬，到時就真係「疊床架屋」兼「自肥」嘞。
應立會要求卻不減薪
事實上，立法會的確多次建議平機會加設營運總裁一職，但同時要求主席減薪配合，多年來未有成事，都係因為主席就薪酬問題「傾唔埋欄」。依家周一鑊竟然斷章取義，只提加設營運總裁係立法會多年來嘅要求，但又唔提減薪建議，咁代表咩呢？講到底咪係佢當咗平機會係獨立王國，鍾意點就點囉，每月袋二十幾萬元，工作量又可減少，認真識歎！