政情:幫警隊fb博like許Sir好頭痕

佔領行動期間日日見傳媒嘅「四點鐘許Sir」深入民心,亦令警察公共關係科總警司許鎮德(許Sir)一炮而紅。闊別螢光幕多時,尋日朝早許Sir西裝骨骨現身黃竹坑警察學院出席學警結業典禮。講起警隊計劃喺facebook開設官方專頁,許Sir顯得好頭痕,佢話仲諗緊計仔令專頁有多啲讚好(like),咁不如用許Sir相片作為專頁頭像?許Sir即刻耍手擰頭話,警隊重視團隊而非個人咁話。

許Sir話,個專頁將走年輕路線,初步計劃開放留言功能畀網民回應,亦會請專人打理同回覆網民,如果反應好,會請人廿四小時跟進添。不過籌備需時,預計今年上半年都未必開到喎!佔領行動後,警民關係一度緊張,警隊諗到用時下年輕人常用嘅社交網站同市民溝通,都係件好事,如果用多啲圖片及影片吸引人睇,發布嘅資訊亦盡量精簡,相信到時不怕冇粉絲嘅。

第一手消息請下載on.cc東網iPhone/iPad/Android/Windows Phone Apps