政情：廠商會節約風茅台停供
國產白酒嘅酒精濃度高，好多北上做生意嘅港人一聽到白酒都耍手擰頭，唯獨國酒茅台係例外，中港政商界一直有唔少捧場客。好似逢親有晚宴就必飲茅台嘅中華廠商聯合會（廠商會），就係茅台酒嘅大客，每年閒閒哋飲咗幾十萬元茅台落肚。我哋收到風，廠商會打算推行新作風，等飲晒庫存茅台之後就唔再入貨，一來慳錢，二來響應中央節約風，可謂一舉兩得。
飲一晚使成萬銀
城中畀面派對多，不過啲商會或社團組織提供酒水多數只係添氣氛，好少好似廠商會中人咁有酒興，幾乎無茅台不歡。聽聞佢哋一次飲宴閒閒哋開幾支茅台，大型飲宴就飲十幾支，甚至幾十支。即使因中央雷厲風行限制公款吃喝，導致茅台價格勁跌，到依家都仲要成千蚊一支，所以一次晚宴飲成萬蚊茅台酒落肚係好閒嘅事。正因為咁，好多唔飲酒嘅商會中人就有微言，因為廠商會係用公款買茅台，如果係淺酌助興就算喇，但實情係好多酒客經常左手一支茅台、右手一個小酒杯，係咁追住人乾杯，氣氛似隊酒多過聯誼囉！
仍可自備或贊助
由於茅台真係唔平，所以聽聞元旦後換屆嘅廠商會新班子打算推行節約風，等茅台存貨飲晒後，除非有特別情況，否則唔會再入貨，不過就唔會反對有人自備或以私人贊助方式提供茅台，以免一班酒客掃興，總之唔好再浪費大筆公款買酒就得喇！
講到尾，飲酒都係為咗助興啫，但係若果經常飲到個個醉醺醺，對商會嘅形象又的確唔係咁好嘅。諗深一層，依家連中央都嚴禁公款吃喝，內地豪飲嘅場面亦收斂唔少，如果香港嘅商會請客吃飯仲係咁樣隊酒，似乎有啲行番轉頭嘅感覺。更何況天下靚酒何其多，點解要獨沽一味，幫襯特定酒商呢？不時轉換吓口味都唔錯吖！