日前我哋報道過上水鄉事委員會主席侯志強有意退出自由黨兼引退，話口未完，佢日前率先享受「半退休」生活，專程去到屬於邊境禁區嘅文錦渡釣魚，成功用魚網活捉逾八斤重嘅鯪魚，即晚再同兄弟老友「擦」餐勁，認真識歎。連串新界鄉村選舉明年揭幕，有意連任上水鄉委會主席嘅侯志強話，其實只係鄉紳推佢上轎，若果有賢能者接棒，佢一定樂意交棒喎。咁又係，侯志強唔引退又點有時間釣大魚呢？
