中環出更：莊學山打造「巾」幗不讓鬚眉專美
香港中華總商會（中總）前晚舉行就職典禮晚宴，當晚冧莊會長嘅楊釗與一眾副會長、常董、會董齊齊打紅底銀花嘅煲呔同領呔，非常一致又搶眼。副會長莊學山話，佢留意到男會員個個都有會呔做「嘜頭」，唯獨女會員無特定服飾，以致出席重要場合時未能 凸顯主人家身份，於是提議為女會員設計專屬絲巾，聽講在場好多女會員都好贊成。
聖誕將至，當然要問吓中總選任會董、康泰旅行社總經理黃進達（Jason）下月嘅旅遊市道啦！Jason話，雖然佔領行動或多或少都影響到生意，但近期日圓跌至新低，整體生意都不過不失。
老婆唔畀黃進達帶團
不過，Jason話自從日本海嘯之後，好多客都鍾意去大阪自由行，揀跟團去日本嘅客就明顯減少。問到Jason會唔會親自帶團搵新景點，佢講笑話老婆一定唔肯，因為工作同玩要分開喎。
講開旅行，立法會議員蔣麗芸（Ann）丈夫、中總常董梁海明就預告，佢哋今年都會去旅行，但就唔會再坐郵輪喎，唔知係咪被今年初阿Ann做「旅霸」佔領郵輪事件嚇怕咗呢？梁話，當日喺海運大廈外佔領嘅歌詩達郵輪「維多利亞號」，明年一月又嚟香港，但今次佢兩公婆已經唔再做船上客。
當晚卓妮見到中總永遠榮譽會長霍震寰同囝囝霍啟文，講起霍震寰之前話恨抱孫，咁佢有冇問過啟文呢？霍震寰就話：「你去問吓佢啦！」卓妮即時轉去問啟文，佢話暫時未有喎。咁霍啟山又點呢？佢話：「如果我有着落，你哋實知啦！」
卓妮