政情：「甘」做和事老 區會逃過「佔領」

僅兩區會提溫和動議

佔領開始以來只有中西區同油尖旺兩個區議會提出過相關動議，但動議字眼都相當溫和，前者就動議促請佔領者盡快開放所有霸佔咗嘅道路，畀市民生活重回正軌；後者就更只係邀請政府有關部門商討佔領行動可能出現嘅情況同未來對策，而其他區議會似乎提都冇提過相關議題。據聞原來係民政事務總署署長陳甘美華在背後發功，充當和事老。

區議會討論政治議題並唔係冇先例，之前國務院發表「一國兩制白皮書」時，十八區區議會建制派都就白皮書提出過相關議案，結果唔係搞到泛民抗議、提出「惡搞」修訂，就係「拉布」式開會。當局唔知係咪吸取咗教訓，聞說有民政事務專員同區內嘅建制派傾偈，叫大家唔好提出涉及佔領行動嘅動議，以免逼泛民埋牆角，為佔領行動火上加油，激發更多人上街參與佔領。

「白皮書事件」前車可鑑

其實，原本大部分嘅區議會都有默契，就係唔將政治議題擺上枱，而泛民亦深知在區議會玩政治議題玩唔到咩花樣。好似過往有泛民議員在區議會提出平反六四議案，都被主席以不符區議會職能為理由而拒絕接納動議，最後泛民亦只能收檔，所以大家都寧願專注處理民生議題。只係白皮書一役建制派打破咗慣例，逼泛民表態，泛民先至反抗，又玩程序拖冧會議，終於搞到一鑊泡。

今次佔領行動大部分區議會都冇提出動議，只係由各區區議會正、副主席在內嘅區議員發聯署公開信呼籲佔領人士撤離，相信都係因為前車可鑑，免得再引起泛民及佔領人士反彈、適得其反。