政情：泛民「四老」 民望急跌

港大民研上周訪問約千名市民，涂謹申自去年四月被踢出「十大」後，今次再爆冷踢走知名度持續低迷嘅譚耀宗，更一躍跳升第二位、僅次於曾鈺成，其餘九人有七人評分下跌，當中葉劉淑儀、袋巾傑、劉慧卿、李卓人，同本身已經低位徘徊嘅AV仁嘅評分都瘋狂急瀉，葉太同劉慧卿排名因而雙雙下跌兩位，排名第四及第六；而前四者嘅評分更分別跌至○八、○六、九四及九五年嘅新低。

五名民望插水嘅議員當中，有四個都係近日力撐佔中嘅泛民議員，包括捲入收受壹傳媒老闆肥佬黎捐款而冇申報醜聞嘅袋巾傑及李卓人。另外兩位就係卿姐同AV仁，兩人身為白鴿黨元老，佔中前拉大隊公開宣誓、義無反顧撐佔中，但佔中至今二人每次落到金鐘現場，都被佔領人士反包圍鬧爆，狠批白鴿黨講就天下無敵，相信「有心無力」係佢哋評分插水原因。

葉劉撐警成「炮灰」

泛民議員評分大插水都唔係冇原因嘅，事關好多個都好錫身，平時都唔多覺佢哋現身佔領區，但每當有大事發生時，佢哋就忽然現身金鐘主台發言「抽水」，連日留守的市民自然看在眼裏。至於葉劉淑儀就成為建制派唯一「炮灰」，相信係同佢連日義無反顧撐警有關，除咗質疑示威學生「唔係省油的燈」，又話學生「郁一郁被人話非禮」，葉太為咗紀律部隊選票撐得咁出力，少少民意犧牲在所難免喇。