中環出更：小吉每日出街「萬步」
佔領行動爆發以來，唔少人返工放工都受阻，有時仲行多咗路添。健康快車創會主席兼籌委會主席方黃吉雯（小吉）就話，佢每日都習慣袋住個「計步器」出街，計算每日行咗幾多步，如果行唔夠目標步數，放工後會去行多一陣，除咗保持身體健康外，仲備戰下月底喺清水灣鄉村俱樂部舉行嘅健康快車慈善跑步行。但小吉因腳痛，故唔可以跑得好快。
習慣袋住「計步器」
小吉話，佢統計過平時每日返工放工，其實大概只係行到三千步左右，想要達到每日行一萬步嘅健康目標，就一定要收工之後再額外去行。其實佢呢個習慣已經係五、六年前開始，一直保持到依家。為咗方便帶個計步器出街，佢買衫時仲會留意埋件衫或條裙有冇袋添，如果冇嘅話，佢就會另外加個袋仔喺件衫裏面或將個計步器放入手袋。
備戰下月慈善跑
博愛醫院永遠顧問黃帆風則係清水灣鄉村俱樂部嘅常客，佢覺得俱樂部環境非常舒服，會定期帶觀塘區嘅市民入去參加活動，一齊享受咁靚嘅大自然，而今次慈善步行就正係一個好好嘅機會畀多啲市民接觸呢個好地方喇。而佢今次會參加五公里組別嘅慈善步行，但估計應該唔需要特別去練習，因佢每朝早返工前都同太太在南灣步行約半小時喎。
相反在清水灣工作嘅鄉村俱樂部副總經理毛翔明，日日對住個俱樂部高爾夫球場，但卻冇乜點打高爾夫球，佢話因為自己比較熱衷游水喎，咁對住個高球場咪好嘥囉？
卓妮