政情：立會淪客棧 泛民死撐

三百訪客近期頻過夜

葉太話，有泛民議員近日以「接見訪客」為由，容許大量示威人士喺立法會大樓通宵留宿，佢引述秘書長陳維安爆料話，一個半星期以來，有接近三百名身份不明嘅訪客，不停喺立法會八至十樓進出同通宵逗留，懷疑佢哋入內目的同立法會事務無關。

根據立法會規則，議員同訪客只可以用立法會資源進行與立法會工作有關嘅活動，示威人士利用立法會地方及資源籌備佔領行動，有違立法會規則。葉太話，立法會係一個莊嚴嘅議事場地，唔係閒雜人等可以肆意借宿嘅客棧，要求曾鈺成除咗要採取果斷措施驅逐留宿嘅示威者之外，亦應該處分濫用立法會資源嘅議員，以儆效尤。

「瞓咗無理由趕人走」

雖然建制派連日來鬧到青筋都現埋，但有份邀請示威人士入內留宿嘅泛民議員仍然理直氣壯，覺得將立法會化身為「劏房」完全無問題。民主黨黃碧雲（一舊雲）尋日繼續死撐，話議員不時都會同訪客喺立法會內開會，如果啲訪客因為太攰而瞓着咗，佢哋無理由要趕走人哋。咁「佔中」同立法會事務有咩關係呢？一舊雲就話示威市民連日瞓街都係想爭取真普選，符合佢哋當年嘅競選政綱喎！

同一舊雲一樣強詞奪理嘅仲有「AV仁」何俊仁，佢承認依家的確多咗訪客入立法會，但就話對方係因為工作關係先進入立法會，又話大家都有認真做嘢，唔係喺度開Party（派對）喎！