政情：中環出更：兩委會失守 葉國謙燒鬚
泛民立法會議員早已揚言喺立法會新會期發起不合作運動，日前就成功「佔領」咗立法會財務委員會轄下嘅工務小組同人事編制小組兩個委員會。呢兩個委員會掌管咗政府財政控制權，建制派理應不容有失，但今次竟然失守，作為建制派「班長」嘅立法會議員葉國謙「肯肯定」係協調不力，呢鑊真係老貓燒鬚。
協調不力 被泛民搶灘
建制派喺兩個小組委員會失守，連帶亦會錯失主席寶座。不過會計界議員梁繼昌今年度已預咗接替議員葉劉淑儀出任人事編制小組主席，即係泛民唔爭都坐定粒六。反而係工務小組，原本協調下應由工程界議員盧偉國（WK）繼續掌舵，依家就危危乎。葉國謙今次可以話係犯下雙重過失。
不過話時話，WK上年度處理「一堆一爐」時畀旁聽嘅公眾大鬧會議室，搞到班議員要搬竇開會，仲喺要就「三堆一爐」表決時擺烏龍，將傳畀建制派嘅箍票短訊錯傳畀泛民，令泛民批評佢作為主席有欠公正，所以佢嘅黨友都冇刻意加入小組為WK撐場。依家小組已淪陷，更加係側側膊、唔多覺喇！
卓妮