政情：中環出更：造人成功 劉燊濤勁緊張
香港工業總會青年委員會早前舉行成立三周年派對，一眾工業界二代齊扮靚靚歡聚一堂。卓妮見到青委副主席劉燊濤（Gary）嘅太太吳奕筠（Daphne）小腹微凸，唔通造人成功？Gary笑不攏嘴報喜話，佢同太太努力近三年，終於得咗，肚中塊肉係BB仔，預產期係明年二月底。Gary爸爸工總主席劉展灝（Stanley）夫婦都有到場，一提到就嚟有乖孫抱，Stanley難掩開心之情，認真恭喜。
Gary自言知道造人成功後，好緊張，即刻買咗好多育嬰書，仲話係佢畢業後第一次睇番書喎！佢日日急補懷孕知識，包括BB每個星期嘅成長變化、孕婦飲食及起居禁忌等，反而太太就冇佢咁緊張。
BB趕住逗利是
Daphne笑笑口話，自己心境好平和，經常唔記得佗緊仔，有時動作大啲，Gary就會出聲提醒，緊張過佢自己。BB嘅預產期係二月底，好接近農曆新年，Daphne就希望BB乖啲，唔好過年出世，因為大家好忙，雖然趕得切逗利是，但都好論盡o架！
嚴玉麟年底抱孫
當晚出席嘅仲有青委名譽主席孫榮聰、青委主席兼德國寶太子女陳嘉賢（Karen）及丈夫馮建輝、仁愛堂前主席史立德囝囝史昊洺及仁濟醫院前主席嚴玉麟囝囝嚴子杰（Jacky）等人。原來Jacky太太Jeanly亦已懷孕多月，BB今年底即將出世。咁啱Jacky同Gary喺同一間拳館學泰拳，睇嚟打拳真係令體魄強健啲。
卓妮