- on.cc 東方互動主頁
- 4月1日 (二)
立法會議員梁美芬（鼠王芬）做主席嘅西九新動力一向都好關注本港海濱發展及水質問題，佢哋耐唔耐都會去抽海水做水質測試，監察本港水質。鼠王芬尋日又去到新油麻地避風塘抽水，真係一路抽一路聞到陣陣臭味。鼠王芬抽完水返到附近私人屋苑嘅海濱長廊時就好感觸話，個海濱長廊有樹，又有草地，但水質有臭味就好似一個靚女離遠睇好靚，但行到埋去先發現原來係臭嘅一樣，大殺風景喎。
屯門望后石污水處理廠故障，搞到啲污水排出大海，引起大家對污水處理嘅關注。鼠王芬尋日去新油麻地避風塘抽水兼抽淤泥外，仲向有關官員提交附近居民簽名，希望當局關注水質同臭味問題。佢話呢個活動一早就籌備，似乎想證明自己唔係「抽水」博曝光。
不過，鼠王芬對抽水同抽淤泥真係親力親為，仲將又黑又臭薰薰嘅淤泥攞畀記者睇。佢又話，有朋友去中東旅行時買過啲死海泥面膜送畀佢，但香港嘅海底泥就唔可以用嚟敷面喇。相信唔使佢講，市民都唔會攞香港嘅海底泥嚟敷面嘅。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
