中環出更：初登銀幕 葉劉做「大茄」
立法會議員葉劉淑儀「政而優則演」，早前首度為一套電影客串區議員一角，日前仲特別舉行放映會為第五十七屆國際數學奧林匹克籌委會籌款添，獲一眾新民黨黨友現身撐場。選舉經驗豐富嘅葉太笑言，飾演區議員冇難度，只係NG（重拍）咗兩三次就收工，但就謙稱自己只係「大茄」喎！
叫番自己個名 NG幾次
葉太透露，佢喺電影入面飾演叫「葉劉淑芝」嘅區議員，得幾句對白，應該輕鬆冇難度，但正式埋位嗰陣就口快快叫番自己個真名，所以先NG咗幾次。唔少人拍戲都容易染上戲癮，葉太就話今次唔算得上係咩專業演出，只係幫年輕導演客串吓啫，坦言冇興趣涉足演藝界，相信佢對政界興趣最大囉。
新民黨區議員陳家珮（Judy）、黃卓健、蘇嘉雯等黨友就拉隊去撐葉太，跑開馬拉松嘅Judy原來對拍戲都好有興趣，透露中學時代試過幕前演出，如果有導演賞識邀約一定會積極考慮咁話。Judy自言性格開朗，韓劇式嘅苦情戲唔啱佢，反而會自薦飾演搞笑、開心嘅角色。
卓妮