中環出更：梁君彥囝囝打Golf 一桿擊中爸爸
悶熱天氣無阻名人打高球嘅熱情，香港保護兒童會尋日在清水灣鄉村俱樂部舉行名人慈善高球日，城中富二代齊報名展身手，立法會議員梁君彥公子、菁英會主席梁宏正（Clarence）都帶隊參賽。卓妮見Clarence揮桿揮灑自如，但原來當初學打高球時蝦碌盡出，除試過打斷球棍，有次更一球打中喺樹林搵緊波嘅爸爸，嚇到佢標冷汗。
Clarence尋日冒雨為慈善揮桿，但未見爸爸同行，唔通怕咗同佢打波？Clarence笑言嗰次係意外，無心「打人」。佢回想打傷爸爸一刻，驚到不知所措，擔心爸爸一旦有乜三長兩短，以後無人養佢喎。意外後，梁君彥無怪責兒子，兩父子仍經常一齊打波。Clarence話，爸爸試過兩次一桿入洞，要跟爸爸學嘢至真。
周瑋瑩延續太婆善心
講番場高球賽，由名媛兼保護兒童會籌款委員會主席周瑋瑩（Jacqueline）牽頭，名醫陳曦齡新抱謝金承美（Tina）拍心口擔任高球日籌委會副主席，Tina仲派出媽咪李春喜落場，自己就喺場邊做啦啦隊。活動吸引近一百人出席，合共籌得近一百萬元。
Jacqueline話，筆錢會用作支援兩間兒童及家庭服務中心嘅營運開支，事關佢同呢個會好有緣，太婆係呢個會創辦人之一，當年不時在旺角街頭派粥畀窮苦家庭嘅小朋友。Jacqueline媽媽都服務呢個會逾二十年，依家交棒畀女兒，望延續助人精神。提起日前發生一宗殺女悲劇，Jacqueline都話好心酸，希望天下間父母痛錫子女。
卓妮