政情：廖偉麟學柔道 撻走「外敵」

留學加國 同窗撩交打

學柔道多年，Jeffrey嘅最大滿足感係揮低外籍同學。話說有次一位外籍同學撩交打，佢轉身將對方一嘢撻落地，動作之快，嚇到對方目瞪口呆，仲懇求唔好將被撻嘅瘀事宣揚開去喎。身懷武藝，難怪Jeffrey日前出席武術活動時手舞足蹈，興致仍濃。咁不如重披柔道袍？佢就話工作太忙碌，唔會喇，有時間都係專心投資好過。

Jeffrey話，個人遊帶旺香港酒店業，有房唔憂租。旺區一帶嘅酒店房間市值，過去半年升值三成，所以今年會部署再掃入精品酒店，慢慢收租咁話。